Féll 107 sinnum á bílprófinu

Flestir gætu sætt sig við eitt eða tvö föll, en þetta er nú fullmikið af því góða! mbl.is/Júlli

Það er ekki annað hægt en að dáðst að þrautseigjunni, en hversu oft þarf maður eiginlega að falla á bílprófinu til að átta sig á því að maður eigi ekki heima undir stýri?

Á vef breska blaðsins Telegraph segir í gær frá 28 ára gömlum Lundúnabúa sem hefur reynt 107 sinnum að ná skriflega bílprófinu, án árangurs.

Í prófinu þarf að svara 50 krossaspurningum á 57 mínútum og er gerð krafa um 43 rétt svör. Annar hluti prófsins er einskonar hættumatspróf, en í því þarf að svara 44 spurningum réttum af 75.

Ökunemar þurfa að standast báða hluta skriflega prófsins til að mega setjast undir stýri með prófdómara sér við hlið.

Próftökugjaldið er um 6.000 krónur íslenskar svo hinn óheppni, en áhugsami, ökunemi hefur eytt samtals 650.000 krónum í tilraunirnar 107.

Metfjöldi tilrauna í verklega hlutann á fertugur maður frá Stoke on Trent, en 37 tilraunir hans kostuðu hann jafnvirði 450.000 króna. Erfiðið bar þó árangur og hann náði prófinu að lokum.

Talsmaður ökuskóla sagði að hér væri vissulega um óvenjulega margar tilraunir að ræða,  en mikilvægt væri að muna að hver og einn lærir á sínum hraða. Ennfremur sýndi þessi þrautseigja hversu mikilvægt bílprófið væri flestu fólki - það væri áfangi sem fólk kepptist að vegna frelsis og sjálfstæðis sem það hefði í för með sér.