Færslur: 2010 Júlí

20.07.2010 10:16

Börn í framsæti.

Tekið af visir.is

Umferðarstofa: 20 börn í lífshættu við leikskóla

Umferðarstofa: 20 börn í lífshættu við leikskóla

Í nýlegri könnun Umferðarstofu og Slysavarnafélagsins Landsbjargar þar sem gerð var athugun á öryggi barna í bílum við 75 leikskóla kom m.a. fram að 20 börn reyndust í lífshættu.

Ástæðan var að foreldrar og/eða forráðamenn barnanna höfðu sett þau í framsæti fyrir framan virkan öryggispúða. 13 þessara barna voru í bílbelti en 3 voru laus.

Í tilkynningu frá Umferðarstofu segir að barn sem er lægra en 150 sm. á hæð má ekki vera farþegi í framsæti bifreiðar sem búin er uppblásanlegum öryggispúða fyrir framan sætið.

Eins mikilvægur og loftpúði í mælaborði getur verið fyrir öryggi fullorðinna þá getur hann reynst stórhættulegur fyrir börn sem eru smærri en 150 sm. Barnið hefur ekki náð nægjanlegum líkamlegum styrk og stoðkerfi þess hefur ekki náð þeim þroska að geta þolað höggið sem púðinn getur veitt. Púðinn springur út á hraða sem nemur u.þ.b. 300km/klst. og hann getur auðveldlega banað barninu hvort sem það er í barnabílstól eða með annan viðeigandi öryggisbúnað.

Það er því öruggara að barnið sé haft í viðeigandi öryggisbúnaði í aftursæti nema tryggt sé að ekki sé uppblásanlegur öryggispúði framan við það í framsæti.

19.07.2010 22:19

Bannað að leggja ökutæki

Bannað að leggja ökutæki - B21.11

Bannað að leggja ökutæki - B21.11

Merki þetta ber að nota þar sem bannað er að leggja ökutæki. Bannið tekur aðeins til þess vegarhelmings sem merkið er á. Bannið gildir í akstursstefnu frá þeim stað þar sem merkið er og að næstu vegamótum. Ef bannið á ekki að ná að næstu vegamótum má setja upp merki á þeim stað þar sem banninu á að ljúka og þar undir ör sem snýr á móti akstursstefnunni (J01.51 eða J01.52). Ef bannið nær aðeins um skamman veg má nota eitt merki með undirmerki sem tilgreinir fjarlægðina (J02.11). Ef þurfa þykir má árétta bannið með merki eða merkjum innan bannsvæðisins og þar undir örvum sem vísa í báðar áttir (J01.61). Nái bannið aðeins til tiltekinna tegunda ökutækja skal velja undirmerki með upplýsingum um það. Þegar bannað er að leggja ökutækjum á tilteknum dögum eða tilteknum tíma logs eða lengur en t.d. 30 mín. skal letra um það upplýsingar á undirmerki (J06.11 eða J07.11). Merki þetta skal ekki nota þar sem stöðumælar eru en þeir gefa til kynna að heimild til að leggja ökutæki sé takmörkuð við tiltekið tímabil gegn greiðslu. Hér má stöðva til að lesta og afferma enda sé unnið við bifreiðina. Að leggja þýðir að yfirgefa bifreiðina eða bíða í bifreiðinni.

02.07.2010 14:42

Vegtollur.

Í ljósi umræðunnar um veggjöld er ekki úr vegi að rifja þetta upp.
Sjá nánar hér 
 Reykjanesbrautin fyrr og nú. Lokaritgerð í umferðafræðum 2009

Ákvörðun um að setja upp tollskúr var tekin þar sem ökumenn skyldu greiða sérstakt gjald aðra leiðina til að mega aka veginn. Sú ákvörðun átti eftir að skapa mikla óánægju meðal fólks, sér í lagi meðal Suðurnesjamanna, og upp hófust mikil blaðaskrif um málið. Fólk var mjög undrandi yfir því að slíkt gjald skyldi aðeins lagt á þennan eina veg og taldi það vera mismunun þar sem að þetta þekktist hvergi annars staðar á landinu. Vegatollur þessi var notaður til að borga lánið sem tekið hafði verið til að gera veginn. Vegaframkvæmdir voru yfirleitt kostaðar með framlagi ríkissjóðs (Ingvar Guðmundsson 1965:193-197). Sagan segir að margur hafi ekið Krísuvíkurleiðina til að sleppa við að greiða gjaldið en það þótti afar hátt í þá daga.

Tollur þessi var við lýði frá árinu 1965 til loka ársins 1972 en þann 31. desember það sama ár var innheimtu umferðargjalds hætt (sbr. Vegminjasafnið1983).


Mynd 5: Mótmæli við tollskúrinn móts við Straumsvík (Faxi 1965:145). 16

Steypti vegurinn var formlega opnaður þann 26. október árið 1965. Þeir sem fyrstir fóru um hann voru þáverandi vegamálastjóri og Ingólfur Jónsson samgönguráðherra á þeim tíma en þeir þurftu ekki að greiða vegatoll. Það var aftur á móti Valgeir Sighvatsson bifreiðarstjóri sem fékk miða nr. 1 þar sem hann var í áætlunarferð á rútubifreið sem hann ók. Valgeir sagði að mikil bylting hafi orðið að fá þennan veg þar sem áður hafi tekið um tvær stundir að aka frá Reykjavík til Keflavíkur (sbr. Valgeir Sighvatsson 2009). Valgeir kemur svo aftur við sögu Reykjanesbrautarinnar síðar.


Mynd 6: Valgeir Sighvatsson og fyrsti veggjaldamiðinn (Víkurfréttir 2008).


Þegar vegurinn var tekinn í notkun var öllu millilandaflugi beint til Keflavíkurflugvallar með tilheyrandi aukinni umferð.

01.07.2010 09:37

Reykjanesbrautin barátta.

Það hefur lengi verið barist fyrir úrbótum á brautinni.
Sjá nánar hér 
 
Reykjanesbrautin fyrr og nú. Lokaritgerð í umferðafræðum 2009


Sérstaklega skemmtileg saga af baráttu um bættar samgöngur.

Þegar Björn Kristjánsson var orðinn þingmaður Gullbringusýslu vildi hann láta gera akveg milli Hafnarfjarðar og Keflavíkur. Þar var þá algerlega veglaust nema hestastígur, troðinn á þúsund árum. Þingmenn voru tregir að veita fé í þennan veg. Þá fékk Björn hesta handa öllum þingmönnum, sem áttu þá sæti í fjárveitinganefnd og bauð þeim í skemmtiför til Keflavíkur. En þegar nokkuð var komið út í hraunið dró úr ferðahug gestanna. Þeir óttuðust tjón lífs og lima, ef lengra væri haldið út í þessa ófæru. Þeir sneru við, en veittu fé til að gera veginn (Jónas Jónsson frá Hriflu 1955:5).


Eftir að lagningu vegarins lauk tók við eilíf barátta um að halda veginum við en hann vildi grafast niður og verða ein klöpp. Það fór illa með bifreiðarnar sem um hann fóru enda var hann lagður fyrir hestvagna. Þó má segja að þá hafi grunnurinn verið lagður að veginum eins og við þekkjum hann í dag (sbr. Skúli Vigfússon 1956:18).


Mynd 3: Suðurnesjavegurinn með Keili í baksýn (Bjarni Guðmarsson 1997a:27).


Steypti vegurinn - Keflavíkurvegurinn

Keflvíkingar eru vaskir menn og djarfhuga. Nú ættu þeir að senda bíl eftir þingfulltrúa sínum og fjárveitinganefnd og aka með þá á þeim tíma dags, þegar umferð er mest og halda þessum framagestum síðan góða veizlu í höfuðborg Suðurnesja, en skora jafnframt á þá að sýna nú landsföðurslegt lundarlag og lofa að gera versta veg landsins öllum vegum betri með skynsamlegu átaki í nokkrar vikur (Jónas Jónsson frá Hriflu 1955:5).

Dropinn sem fyllti mælinn?

Þann 30. nóvember árið 2000 rákust tvær bifreiðar saman rétt vestan við Kúagerði. Þrír létu lífið, hjón í annarri bifreiðinni og karlmaður í hinni. Lítil stúlka, sem var farþegi í bifreið karlmannsins, slasaðist alvarlega en lifði af. Þau sem fórust áttu öll rætur að rekja til sömu götunnar í Keflavík. Fólk á Suðurnesjunum hafði á þessum tíma fengið miklu meira en nóg vegna þeirra tíðu slysa sem tekið höfðu margan manninn. Áhugahópur um örugga Reykjanesbraut varð til og hreyfing komst á málin:

Áhugahópur um örugga Reykjanesbraut var stofnaður þann 11. desember árið 2000 á fundi á Hótel Keflavík. Á þeim fundi var mér falin formennska í þeim kraftmikla hópi og hef ég sinnt því hlutverki síðan. Frægur borgarafundur var haldinn þann 11. janúar 2001 og var hann í raun upphafið að því starfi sem þetta málefni hefur kallað á (Steinþór Jónsson).

01.07.2010 09:24

Reykjanesbraut

Mörg slys hafa orðið á Reykjanesbrautinn þó svo að tvöföldun brautarinnar sé staðreynd að miklu leiti.
Sjá nánar hér 
 Reykjanesbrautin fyrr og nú. Lokaritgerð í umferðafræðum 2009


Mynd 11: Fjöldi banaslysa og látnir í slysum á Reykjanesbraut (Gunnar Geir Gunnarsson 2009).

Banaslys og slys með eða án meiðsla hafa verið tíð á Reykjanesbrautinni í gegnum árin. Þó eru ekki til kerfisbundnar skráðar heimildir svo vitað sé um slys almennt til 1966. Heimildir eru hins vegar til um banaslys allt frá árinu 1966 eins og komið hefur fram. Á töflunni hér fyrir ofan má sjá fjölda banaslysa á Reykjanesbraut allt frá árinu 1966 til ársins 2006.

Frá árinu 1999 er til nákvæm skráning slysa og umferðaróhappa þar sem fram koma ástæður slysanna og aðstæður á vegi. Samtals urðu slys og óhöpp á Reykjanesbrautinni 847 á tímabilinu 1999-2008. Slys þar sem fólk lést eða slasaðist voru 438 talsins. Alvarlega slasaðir og látnir voru 57. Þessar tölur sýna að Reykjanesbrautin tekur sinn toll eins og sjá má á súluritinu hér að neðan:


Mynd 12: Tegundir slysa á Reykjanesbraut eftir alvarleika þeirra á árunum 1999-2008 (Gunnar Geir Gunnarsson 2009).

  • 1
Flettingar í dag: 58
Gestir í dag: 13
Flettingar í gær: 55
Gestir í gær: 30
Samtals flettingar: 623018
Samtals gestir: 123975
Tölur uppfærðar: 19.9.2019 02:28:34

Arney ökukennsla

Nafn:

Karl Einar Óskarsson

Farsími:

847-2514

Heimilisfang:

Heiðarhorn 3 Keflavík

Heimasími:

423-7873

Um:

Tek að mér ökukennslu í réttindaflokki B ( bifreið ). Kenni á Toyota Auris 2013

Tenglar